Qəbələdə “Əmək yarmarkası” keçirilmişdir.
“Məşğulluq haqqında” Azərbaycan Respublikası Qanununa, Qəbələ Rayon İcra Hakimiyyəti Başçısının 2014-cü il üçün təsdiq etdiyi “ Ərazi Məşğulluq Proqramı”na , Azərbaycan Respublikası Əmək və Əhalinin Sosial Müdafiəsi Nazirliyi yanında Dövlət Məşğulluq Xidmətinin qrafikinə uyğun olaraq rayon məşğulluq mərkəzinin təşkilatçılığı ilə 22 oktyabr 2014-cü il tarixdə işsiz və işaxtaran vətəndaşların səmərəli məşğulluğunu təmin etmək məqsədilə aktiv məşğulluq tədbiri olan əmək yarmarkası keçirilmişdir.
Yarmarkanı giriş sözü ilə açan rayon məşğulluq mərkəzinin direktoru Elxan Səlimov ölkə başçısının həyata keçirdiyi düşünülmüş iqtisadi siyasət nəticəsində Azərbaycan iqtisadiyyatının davamlı inkişafından və bu proseslərə Dövlət Məşğulluq Xidmətinin verdiyi töhfələrdən danışmışdır. Elxan Səlimov bildirmişdir ki, ölkənin davamlı inkişafının təmin olunması məqsədilə həyata keçirilən mühüm dövlət proqramları nəticəsində makroiqtisadi göstəricilər ilbəil artır, böyük infrastruktur layihələri icra olunur, respublikanın bütün bölgələrində yeni yaradılan iş yerlərinin sayı durmadan artır. Bütün bunlar təbii ki, əhalinin məşğulluq imkanlarının artmasına xidmət edir.
Tədbirdə rayon icra hakimiyyətinin nümayəndəsi Tahir Hacıyev, Dövlət Məşğulluq Xidmətinin nümayəndəsi Siyafər Əhmədov və başqaları çıxış edərək əmək yarmarkasının keçirilməsinin bugünkü əhəmiyyətindən, Azərbaycan Respublikasının Prezidenti cənab İlham Əliyevin işsiz əhalinin məşğulluğunun təmin edilməsi, yoxsulluğun aradan qaldırılması istiqamətində qarşıya qoyduğu vəzifələrdən danışmışlar.
Yarmarkaya hazırlıq dövründə aparılan genişmiqyaslı təşkilati işlərin, xüsusilə işəgötürənlərlə yaradılan qarşılıqlı əməkdaşlıq münasibətlərinin nəticəsində bu mühüm aktiv məşğulluq tədbirində işəgötürənlərin, işsiz və işaxtaran vətəndaşların fəal iştirakı təmin edilmişdir. Həyata keçirilən tədbirlərin nəticəsi olaraq rayon ərazisində fəaliyyət göstərən 45 müəssisə və təşkilat 334 boş iş yeri verərək, yarmarkada iştirak etmişdir. Yarmarkaya gələn 481 nəfər işaxtaran vətəndaşların 99 nəfərinə münasib işlərə göndəriş verilmişdir.
