YAP sıralarına qəbul olunanlara vəsiqələr təqdim olunub
Qəbələ Turizm və Otelçilik üzrə Peşə Tədris Mərkəzi Respublikada fəaliyyət göstərən, müasir tələblərə cavab verən ilk peşə tədris mərkəzidir. Ölkə Prezidenti cənab İlham Əliyevin “Peşə təhsilinin inkişafı ilə bağlı Dövlət Proqramı”na uyğun olaraq rayonda belə bir tədris mərkəzi yaradılmışdır. Mərkəz pedaqoji fəaliyyətinə 2009-cu ildən başlamışdır. Burada əsas məqsəd turizm və otelçilik sahəsinə aid olan müxtəlif peşələr üzrə kadr hazırlamaqdır. Tədris mərkəzində rayonun qəsəbə və kəndlərindən, eyni zamanda respublikanın müxtəlif şəhər və rayonlarından 7 ixtisas üzrə 194 nəfər şagird seçdikləri peşə üzrə təhsil alırlar. Mərkəzdə tədris Azərbaycan Respublikası Təhsil Nazirliyinin müvafiq təlimatına əsasən həyata keçirilir. Hal-hazırda Mərkəzdə 27 nəfər mühəndis-pedaqoji işçi heyəti çalışır. Məktəbin pedaqoji kollektivinin üzvləri Təhsil Nazirliyinin dəstəyi ilə Türkiyə Respublikasında ixtisasartırma kurslarında və seminarlarda iştirak etmişlər. "Təhsil hər bir dövlətin, ölkənin, cəmiyyətin həyatının, fəaliyyətinin mühüm bir sahəsidir". Mərkəzdə Təhsil alan şagirdlərin vətənpərvərlik və dövlətçilik ruhunda tərbiyəsi burada qarşıya qoyulmuş əsas məqsədlərdən biridir. Bu gün ölkənin yüksək səviyyədə, müsbət istiqamətdə inkişaf etməsi məhz hakim partiyanın düzgün siyasətinin nəticəsidir. Bu fikirlər bu gün tədris mərkəzində YAP-nın sıralarına qəbul olunması toplantısında səslənmişdir. Mərkəzin mühəndis-pedaqoji kollektivi və şagirdlərin YAP Qəbələ Rayon Təşkilatına müraciətləri əsasında 15 nəfərə üzvlük biletləri təqdim olunmuşdur. Tədbirdə Tədris Mərkəzinin direktoru Eyvaz Kazımov və YAP-ın Qəbələ Rayon Təşkilatının sədr müavini Elçin Tağıyev kollektiv qarşısında çıxış etmiş, partiya sıralarına qəbul olunan gəncləri təbrik etmişlər.Partiya sıralarına qəbul olanlar adından H.Cabbarov çıxış edərək bildirmişdir ki, onlar daim ölkə Prezidenti cənab İlham Əliyevin ətrafında sıx birləşəcək, Azərbaycanın ictimai-siyasi həyatında fəal iştirak edəcəklər.
