Qəbələdə keçirilən regional müşavirədə əhaliyə göstərilən sosial xidmətin vəziyyəti müzakirə olunub.
Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondu Qəbələ rayonunda regional müşavirə keçirib. Qəbələ, Balakən, Zaqatala, Qax, Şəki, Oğuz, İsmayıllı, Ağsu, Ağdaş, Göyçay, Ucar, Kürdəmir, Mingəçevir, Naftalan, Yevlax və Bərdə rayon şöbələrinin əməkdaşlarının iştirakı ilə keçirilən müşavirədə Fondun fəaliyyət istiqamətləri üzrə görülən işlər, sosial təminat növlərinin təyinatı üzrə əhaliyə göstərilən xidmətin vəziyyəti müzakirə edilib. Fondun direktor müavini Cavid Abdullayev sosial sığorta daxilolmaları üzrə həmin rayonlarda əldə olunan nəticələri, ayrı-ayrı şöbələrin büdcə proqnozları sahəsindəki göstəriciləri, sosial sığorta edənlərlə işin təşkilində və sosial təminat növlərinin təyinatı sahəsində əhaliyə göstərilən xidmətlərdə yol verilən nöqsanları diqqətə çatdırıb. Rayon şöbələrinin hər birinin fəaliyyəti ayrı-ayrılıqda təhlil olunub. Sosial sığorta münasibətlərinin sığorta-pensiya sisteminin tələblərinə uyğun və tam şəffaf qurulması, bu sahədə fiziki və hüquqi şəxslərlə işin düzgün təşkili ilə bağlı müşavirə iştirakçılarına təlimatlar verilib. Sosial təminat növlərinin təyinatı zamanı süründürməçilik, vətəndaşların müraciətlərinin cavablandırılmasının gecikdirilməsi hallarına yol verən şöbələrin fəaliyyəti tənqid olunub. Mövcud olan nöqsan və çatışmazlıqların qısa müddətdə aradan qaldırılması tapşırılıb. Sosial sığorta daxilolmalarında əhəmiyyətli artımların təmin edilməsi və sosial sığorta daxilolmaları üzrə büdcə proqnozlarına əməl olunması üçün zəruri tədbirlərin görülməsi, vətəndaşlarla münasibətlərdə etik davranış qaydalarının rəhbər tutulması, müraciətlərin vaxtında, tam və dolğun şəkildə cavablandırılması və s. barədə tapşırıqlar verilib.
.jpg)
.jpg)
