“Şahin” hərbi-idman oyunu üzrə rayon birinciliyi keçirilmişdir.
Gənclərin hərbi vətənpərvərlik tərbiyəsinin gücləndirilməsində, onların fiziki hazırlıqlarının artırılmasında, ordu sıralarına hazırlanmasında mühüm rol oynayan “Şahin” hərbi-idman oyunu üzrə rayon birinciliyi Qəbələ rayon Gənclər və İdman idarəsinin təşkilatçılığı ilə 29 mart 2014-cü il tarixdə Qəbələ şəhər 2 saylı tam orta məktəbdə keçirilmişdir.
Yarışın açılış mərasimində rayon Gənclər və İdman İdarəsinin rəisi Fəxri Soltanov çıxış edərək gənc şahinləri salamlamış və “Şahin” hərbi - idman oyununun keçirilməsində məqsədin məktəblilər arasında aparılan hərbi vətənpərvərlik tərbiyəsi işini daha da gücləndirmək, orta məktəb şagirdlərinin hərbi-idman oyunlarına geniş cəlb etməklə onların ordu sıralarında xidmətə hazırlığını inkişaf etdirməkdən ibarət olduğunu bildirmişdir. Rayonun tam orta məktəblərinin X-XI sinif şagirdlərinin iştirak etdiyi yarış gərgin idman mübarizəsi şəraitində keçmişdir. Yarışın əsasnaməsinə uyğun olaraq sıra hazırlığı mərhələsi keçirilmiş, daha sonra komandalar estafet mərhələsində mübarizələrini davam etdirmişlər.
Yarışın yekun nəticəsinə əsasən Soltannuxa kənd tam orta məktəbin komandası I yeri, Qəbələ şəhər 2 saylı tam orta məktəbin komandası II yeri və Qəbələ şəhər 1 saylı tam orta məktəbin komandası III yeri tutmuşdur. Qalib komandalara Gənclər və İdman İdarəsinin diplomları təqdim edilmişdir.
