Goranboy və Ağdaş rayonlarının məktəbliləri Qəbələ rayonuna gəlmişlər.
Onlar “Ölkəmizi tanıyaq” tur-aksiyasının proqrama uyğun olaraq rayonun tarixi-mədəni abidələri, turizm obyektləri və muzeyləri ilə tanış olmuşlar.
Şagirdlər əvvəlcə rayon tarix-diyarşünaslıq muzeyinə gələrək, Qəbələnin zəngin və çox əsrlik tarixi haqqında ətraflı məlumatlar aldıqdan sonra Heydər Əliyev Mərkəzini ziyarət etmiş, ümummilli liderin həyatını və siyasi fəaliyyətini əks etdirən ekspozisiyaya baxmışlar. Sonra şagirdlər şəhər məscidinə, “Beltmann” piano fabrikinə baş çəkmişlər. Turizm sektoru ilə maraqlanan məktəblilərə “Tufandağ” Qış-Yay Turizm İstirahət Kompleksində, beşulduzlu “Qafqaz Riverside”, “Qafqaz Resort”, “Qafqaz Sport” otellərində, “Fitnes” istirahət-sağlamlıq mərkəzində rayondakı müasir turizm infrastruktu, bölgənin füsunkar təbiəti ilə bağlı ətraflı məlumatlar verilmişdir.
Daha sonra məktəblilər Çuxur Qəbələ Tarix Bədii Qoruğunda və udilərin kompakt yaşadığı Nic qəsəbəsində olmuşlar.
