Qəbələ rayonunda Azərbaycan polisinin yaranmasının 97-ci ildönümü qeyd olunmuşdur.
2 iyul – Azərbaycanda Polis Günü münasibətilə Qəbələ rayon hüquq mühafizə orqanlarının əməkdaşları şəhərin mərkəzi meydanındakı ulu öndər Heydər Əliyevin adını daşıyan parka gələrək Ümummilli liderin abidəsini ziyarət etmişlər. Daha sonra polis şöbəsinin rəisi, polis polkovnik –leytenantı Ehtibar Abduyev çıxış edərək Polis Günü münasibətilə polis işçilərini təbrik etmiş, Azərbaycan polisinin yarandığı gündən dövlətçiliyimizin və qanunçuluğumuzun keşiyində sayıq dayandığını, vətəndaşların hüquqlarının qorunmasında, ictimai asayişin möhkəmləndirilməsində əvəzsiz xidmətləri olduğunu diqqətə çatdırmışdır. Natiq öz çıxışında Ümummilli lider Heydər Əliyevin qayğısı sayəsində Azərbaycanda milli polisin formalaşdığını, dövlətçiliyimizin dayaqlarından biri kimi çevik quruma çevrildiyini vurğulayaraq möhtərəm Prezident cənab İlham Əliyevin qarşıya qoyduğu vəzifələrin həyata keçirilməsində polisin peşəkarlığını durmadan artırdığını, vətəndaşların rahatlığı üçün bütün qüvvələrini səfərbər etdiyini qeyd etmişdir.
Daha sonra polis əməkdaşları Heydər Əliyev Mərkəzinə baxış keçirmişlər. Burada əməkdaşlara dahi şəxsiyyətin həyat-fəaliyyəti barədə ətraflı məlumat verilmişdir. Qeyd olunmuşdur ki, 1918-ci il may ayının 28-də müstəqilliyini bəyan etmiş Azərbaycan Xalq Cümhuriyyətinin milli hökumətinin tərkibində Daxili İşlər Nazirliyi yaradılıb. Dahi şəxsiyyət Heydər Əliyevin 1998-ci ilin martında imzaladığı Fərmana əsasən, hər il iyulun 2-si daxili işlər orqanları əməkdaşlarının peşə bayramı kimi qeyd olunur. Toplantıda rayon hüquq mühafizə orqanlarının əməkdaşları ilə yanaşı, rayon icra hakmiyyəti başçısının birinci müavini Abil Ağasəfov çıxış edərək polis işçilərinə təbriklərini ünvanlamış, Azərbaycan polisinə ulu öndər Heydər Əliyevin hakimiyyəti illərində böyük diqqət və qayğının göstərildiyi, hazırda da polis əməkdaşlarının əməyinin ölkə başçısı cənab İlham Əliyev tərəfindən layiqincə qiymətləndirildiyi vurğulamışdır. Bildirilmişdir ki, Azərbaycan polisi ölkəmizdə təhlükəsizliyin, sabitliyin, asayişin qorunmasının etibarlı təminatçısıdır.
Tədbirdə iştirak edən digər rəsmi şəxslər, veteran polislər
çıxış edərək polis işçilərinə əlamətdar gün münasibətilə təbriklərini çatdırmış, respublikada sabitliyin təmin olunmasında, cinayətkarlığa qarşı mübarizədə asayiş keşikçilərinin müstəsna xidmətləri olduğunu bildirmişlər. Sonda rayon polis şöbəsi tərəfindən xidmətində fərqlənən bir qrup polis əməkdaşına, veteran polislərə diplom və fəxri fərmanlar, qiymətli hədiyyələr təqdim olunmuşdur.
