Şahmat üzrə rayon birinciliyi keçirilmişdir.
Şahmat idman növünün kütləviliyinin təmin olunması, yarış iştirakçılarının idman ustalıqlarının artırılması, həmçinin müvafiq yaş qrupları üzrə rayonun yığma komandasının tərkibinin müəyyənləşdirilməsi məqsədilə gənclər və idman idarəsi tərəfindən “31 Dekabr - Dünya Azərbaycanlılarının Həmrəyliyi günü”nə həsr olunmuş rayon birinciliyi keçirilmişdir. Birinciliyin açılış mərasimində rayon Gənclər və İdman İdarəsinin rəisi Fəxri Soltanov çıxış edərək “31 Dekabr - Dünya Azərbaycanlılarının Həmrəyliyi günü” və yeni il münasibətilə iştirakçıları təbrik etmiş, onlara uğurlar arzulamışdır. 8-10-12-14 və 16 yaş qruplarında yeniyetmə və gənclər dairəvi sistem üzrə mübarizə aparmışlar. Yarışda 60-ə qədər oğlan və qızlar öz qüvvələrini sınamışlar. Birinciliyin yekununa əsasən hər yaş qrupunda I, II və III yerləri tutan qaliblərə rayon gənclər və idman idarəsinin diplomları təqdim edilmişdir.
