Qəbələ rayonunda Üzeyir Hacıbəyli XVI Beynəlxalq Musiqi Festivalı çərçivəsində Bakı Kamera Orkestrinin konserti keçirilmişdir
21 sentyabr 2024-cü il tarixdə Heydər Əliyev Fondunun təşkilatçılığı, Azərbaycan Respublikası Mədəniyyət Nazirliyinin və Üzeyir Hacıbəyli adına Bakı Musiqi Akademiyasının dəstəyi ilə keçirilən Üzeyir Hacıbəyli XVI Beynəlxalq Musiqi Festivalı çərçivəsində Bakı Kamera Orkestrinin Qəbələ Rayon Mədəniyyət Mərkəzində konsert proqramı keçirilmişdir. Bədii rəhbəri Azərbaycan Respublikasının Xalq artisti, professor Fərhad Bədəlbəyli, baş dirijoru Əməkdar artist Fuad İbrahimov olan Bakı Kamera Orkestrinin təqdim etdiyi konsert Azərbaycanın musiqi mədəniyyəti salnaməsinə qızıl hərflərlə adını yazdırmış dahi bəstəkar, musiqişünas, pedaqoq, publisist, ictimai xadim Üzeyir Hacıbəylinin anadan olmasının 139-cu ildönümünə həsr olunub. Kamera musiqisi axşamında tamaşaçılar Xalq artistləri Yeganə Axundova (piano) və Gülnaz İsmayılova (soprano), Nəzrin Aslanlı (violin), Mahir Tağızadə (bariton), Qəmər Kərimlinin (violin) ifasında Avropa və Azərbaycan bəstəkarlarının əsərlərini dinləyiblər.
