Qəbələ rayonunda bilik günü qeyd olunmuşdur.
Bu gün məktəblərdə yeni dərs ilinin ilk günüdür. Azərbaycanda məktəblərdə dərslərin başladığı gün kimi qeyd edilən 15 sentyabr - “Bilik günü” Qəbələ rayonunda da qeyd olunmuşdur. Yeni dərs ilinin başlanması ilə əlaqədar rayonun 68 ümumtəhsil məktəbi, 53 tam orta, 11 ümumi orta, 4 ibtidai məktəbi bilik gününə tam hazırlıq vəziyyətinə gətirilmişdir. Qeyd etmək lazımdır ki, ötən dövr ərzində rayonda 5520 şagird yerlik yeni 25 məktəb tikilib istifadəyə verilmişdir ki, bunun da 2020 şagird yerlik 9 məktəbi Heydər Əliyev Fondu tərəfindən inşa olunmuş o cümədən Fondunun təşəbbüsü ilə 320 şagird yerlik Çuxur Qəbələ tam orta məktəb binası əsaslı təmir edilmişdir. Yeni dərs ilində məktəblərin inventar və avadanlıqla təmin olunması həmişə olduğu kimi yenə də diqqət mərkəzində saxlanılmışdır. Yerli büdcə hesabına ümumilikdə 294143 manat dəyərində 1029 ədəd parta, 100 ədəd yazı lövhəsi, 200 ədəd kitab şkafı, 1300 ədəd stul, 200 ədəd müəllim masası 15 ədəd direktor kabineti dəsti, 50 ədəd paltar şkafı və müxtəlif adda inventar avadanlıq alınaraq bölgü əsasında məktəblərə paylanılmışdır. 15 sentyabr - “Bilik günü”, yeni dərs ilinin başlanması münasibətilə Qəbələ RİH-nin sifarişi ilə rayonun Kiçik Pirəli kəndində inşa olunmuş 180 şagird yerlik daha yeni bir məktəbin açılışı olmuşdur. 2012-ci ilin mart ayında tikintisinə başlanmış məktəbin daxilində istilik sistemi quraşdırılmış, müasir informasiya telekommunikasiya texnologiyaları ilə təmin olunmuşdur. “Bilik günü” münasibətilə tədbirdə iştirak edən Azərbaycan Respublikasının Milli Məclisinin Deputatı, Respublika Ağsaqqalr şurasının sədri Fəttah Heydərov çıxış edərək yeni dərs ilinin başlanması münasibəti ilə öz təbriklərini çatdırmış, dövlətin təhsil sahəsinə göstərdiyi qayğıdan ətraflı söz açmış, gənc nəslin təhsil alması, cəmiyyətdə savadlı, dünyagörüşlü vətəndaşlar kimi formalaşmasına dövlətimizin xüsusi diqqətlə yanaşdığının diqqətə çatdırmışdır. Qeyd olunmuşdur ki, təhsil müəssisələrində çalışan işçilərin əmək haqlarının və tələbələrin təqaüdlərinin artırılması haqqında Azərbaycan Respublikasının Prezidenti cənab İlham Əliyevin sərəncamları, Qəbələ rayonunun sosial-iqtisadi inkişafı ilə bağlı Dövlət Proqramı və Heydər Əliyev Fondunun prezidenti, UNESCO-nun və İSESCO-nun xoşməramlı səfiri, Milli Məclisin deputatı Mehriban xanım Əliyevanın təşəbbüsü ilə həyata keçirilən "Yeniləşən Azərbaycana yeni məktəb proqramı" və digər irimiqyaslı layihələr qarşıya qoyulan vəzifələrin icrasına, tədris müəssisələrinin maddi-texniki bazasının möhkəmlənməsinə yönəldilmişdir. Tədbirdə çıxış edən Rayon İcra Hakimiyyətinin Başçısı Səbuhi Abdullayev “Bilik günü” münasibətilə pedaqoji kollektivi, valideyinləri təbrik etmiş, məktəb şagirdlərinə təhsildə uğurlar arzulamışdır. Qeyd olunmuşdur ki, ölkə rəhbərinin təhsil ocaqlarına göstərdiyi diqqət və qayğı nəticəsində son illərdə Azərbaycanın təhsil sistemində bir çox uğurlar əldə olunub, Diqətə çatdırılıb ki, regionlarda yeni tədris binalarının inşası və əsaslı təmiri, təhsil ocaqlarının tələb olunan maddi texniki baza ilə təmin olunması ölkə Prezidenti cənab İlham Əliyevin apardığı təhsil siyasətinin uğurunun göstəricisidir. Bildirilib ki, bütün bu təhsil sahəsində reallaşdırılan uğurlar və yeniliklər ölkədə savadlı kadrların formalaşması istiqamətində aparılan düzgün siyasətin bariz nümunəsidir. Tədbirdə çıxış edən müəllimlər, valideyinlər “Bilik günü” münasibətilə şagirdləri təbrik etmiş onlara təhsildə uğurlar arzulamışlar. Daha sonra uşaqlara məktəb ləvazimatları və çantalar təqdim olunmuşdur. Sonda tədbir iştirakçıları yeni məktəbin inzibati binası ilə tanış olmuşlar.
